મોદી સરકારે રાજ્યનું જળસંકટ 10 વર્ષમાં દૂર કર્યું હતું: અમિત શાહ, કેન્દ્રીય ગૃહમંત્રી

આ પ્રસંગે કેન્દ્રીય ગૃહમંત્રી અમિત શાહે કહ્યું હતું કે, આજનો નાનકડો કાર્યક્રમ  શેલાના તળાવના પુનઃ નિર્માણનો છે પરંતુ આનો ઉદેશ્ય ખૂબ મોટો છે, ભવિષ્યની જરૂરિયાત છે જળ, તેથી તેનું સંરક્ષણ જરુરી છે. પાણીના સંરક્ષણ માટે, સમાજને જોડવા માટે વડાપ્રધાન નરેન્દ્રભાઈએ અથાગ કાર્યો કર્યા છે. ગુજરાતના વિકાસની સૌથી મોટી સમસ્યા પાણી હતી તેમાં મોદી સરકારને મોટી સફળતા મળી છે. નરેન્દ્રભાઇ જ્યારે મુખ્યમંત્રી હતાં ત્યારે તેમણે રાજ્યનું જળસંકટ 10 વર્ષમાં દૂર કર્યું છે. મારા ગામમાં પણ વર્ષો જૂની વાવ જેને લાખા વણઝારાની વાવ તરીકે ઓળખાય છે, જે જળસંચય માટે જરૂરી છે. આઝાદીના અમૃત મહોત્સવ પ્રસંગે  75 તળાવો બનાવવાની જાહેરાત વડાપ્રધાન નરેન્દ્ર ભાઈએ કરી છે, તો  આપણે 80 તળાવ બનાવવાના છે. જેનાથી જળસંચય તો થશે સાથે પર્યાવરણની જાળવણી પણ થશે. દરેક તળાવ આસપાસ  નાનકડું વન ઉભુ કરાશે જેનાથી આસપાસના વિસ્તારનું તાપમાન નિયત્રંણમાં રહેશે.

સાથે જ તેમણે ઉમેર્યુ કે, સરકાર યુવાનો, વૃદ્ધ તેમજ મહિલાઓના આરોગ્યની જાળવણી માટે પણ કામ કરશે. ગુજરાતના મુખ્યમંત્રીએ નરેન્દ્ર ભાઇની યોજનાઓને જન જન સુધી પહોંચાડી છે. આયુષ્યમાન કાર્ડ, અન્ન યોજના, સગર્ભા મહિલાઓ માટેની યોજનાઓ ખુબ લાભદાયી નીવડી છે. આવનાર સમયમાં ગાંધીનગર લોકસભા મતક્ષેત્ર દેશનું સૌથી વિકસિત બનશે. સાથે જ આ મત ક્ષેત્ર લીલુંછમ બની રહેશે તેવું વચન આપું છું.