Sharad Pawar : લોકસભાની ચૂંટણીના પરિણામ (Lok Sabha Election Result) માં ભલે કોઇ પાર્ટીને બહુમતી (Majority)ન મળી હોય પણ NDA નો આંકડો 292 એટલે કે બહુમતીના આંકડાને પાર કરી ગયો છે. તાજેતરમાં તે સ્પષ્ટ પણ થઇ ગયું છે કે, NDA સરકાર બનાવવા જઇ રહી છે. આ પરિણામે JDU ના નીતિશ કુમારની માંગ વધારી દીધી છે. પણ બીજી તરફ INDIA ગઠબંધન પાસે એક ચાણક્ય છે જે કોઇ પણ સમયે પત્તુ ફેરવી દેવા માટે જાણીતા છે. અને તે છે રાષ્ટ્રવાદી કોંગ્રેસ પાર્ટી (SP)ના અધ્યક્ષ શરદ પવાર (Sharad Pawar). તેમણે ઘણીવાર પોતાના નિર્ણયોથી સૌ કોઇને ચોંકાવી દીધા છે. ત્યારે ચર્ચા એ પણ થઇ રહી છે કે આ વખતે પણ તેઓ કઇંક એવું કરી શકે છે કે INDIA ગઠબંધન સરકાર બનાવી શકે.
શરદ પવારની રણનીતિ પર સૌ કોઇની નજર
10 વર્ષ બાદ દેશમાં એકવાર ફરી ગઠબંધનની સરકાર બનવા જઇ રહી છે. દેશની જનતાએ આ વખતે કોઇ પક્ષને સ્પષ્ટ બહુમતી આપી નથી. ભલે ભાજપ દેશની સૌથી મોટી પાર્ટી તરીકે ઉભરી આવી હોય, પરંતુ તેની બહુમતીનો આંકડો 272થી 32 સીટો ઓછો આવી ગયો છે. NDAને 292 સીટો મળી હોવા છતાં નરેન્દ્ર મોદી સરકાર ફરી એકવાર પુનરાગમન કરતી જોવા મળી રહી છે. જોકે, આ વચ્ચે લોકસભા ચૂંટણીના પરિણામો બાદ વિપક્ષી ગઠબંધનમાં સામેલ પક્ષોએ વિવિધ રણનીતિઓ તૈયાર કરવાનું શરૂ કરી દીધું છે. આ દરમિયાન સૌ કોઇની નજર રાષ્ટ્રવાદી કોંગ્રેસ પાર્ટી (SP)ના પ્રમુખ શરદ પવાર (Sharad Pawar) પર છે. એવું માનવામાં આવે છે કે 83 વર્ષીય દિગ્ગજ નેતા વિપક્ષી ગઠબંધનની ભાવિ રણનીતિ બનાવવામાં મહત્વની ભૂમિકા ભજવી શકે છે. શરદ પવાર હાલમાં દિલ્હીમાં છે, ચૂંટણી પરિણામો અંગે તેમણે કહ્યું કે લોકસભા ચૂંટણીના પરિણામો દર્શાવે છે કે દેશની સ્થિતિ રાજકીય પરિવર્તન માટે અનુકૂળ છે. જો કે, તેમણે એમ પણ કહ્યું કે વિપક્ષી ગઠબંધન કેન્દ્રમાં સરકાર બનાવે તેવી શક્યતા નથી.
કેમ શરદ પવારને કહેવાય છે રાજકારણના ચાણક્ય?
શરદ પવારને રાજકારણના ચાણક્ય કહેવામાં આવે છે તે કારણ વગર નથી. જ્યારે પવાર 1978માં 38 વર્ષની વયે મહારાષ્ટ્રના સૌથી યુવા મુખ્યમંત્રી બન્યા ત્યારે તેમણે ખૂબ જ ઘાતક પગલું ભર્યું હતું. તે સમયે વસંતરાવ દાદા પાટીલ રાજ્યના મુખ્યમંત્રી હતા, પવાર તેમની સરકારમાં ઉદ્યોગ મંત્રી હતા. મુખ્યમંત્રી પાટીલે પવારને તેમના ઘરે લંચ માટે આમંત્રણ આપ્યું હતું. આ દરમિયાન જમતી વખતે શરદ પવારે મુખ્યમંત્રી પાટીલને કહ્યું, દાદા મારી ભૂલ માફ કરી દો. આના જવાબમાં વસંતદાદાએ કહ્યું – તું આપણો બાળક છે. જોકે તેમને ખબર ન હતી કે શરદ પવાર શેના માટે માફી માંગી રહ્યા છે. તે પછી પવાર CMના ઘરની બહાર આવે છે અને સાંજ સુધીમાં તેમના 38 ધારાસભ્યો અલગ થઈ જાય છે. વસંતદાદા પાટીલના હોશ ઉડી જાય છે. તે સમયે ચંદ્રશેખરની પાર્ટી સાથે મળીને મહારાષ્ટ્રમાં નવી સરકાર બનાવી અને પોતે CM બન્યા. શરદ પવારનો આછો અંદાજ લગાવવો સરળ નથી. વર્ષ 2019માં તેમના ભત્રીજા અજિત પવારે પવાર સાથે વિશ્વાસઘાત કરવાનો પ્રયાસ કર્યો હતો, જેના પછી તેઓ તેને થોડા જ કલાકોમાં લાઈનમાં લઈ આવ્યા હતા. આ પછી તાજેતરમાં અજિત પવારે શરદ પવારની પાર્ટી તોડી નાખી હતી. આ વખતના ચૂંટણી પરિણામોએ સ્પષ્ટ કરી દીધું કે અસલી NCP કોણ છે.
શું હશે શરદ પવારનો આગળનો પ્લાન?
શરદ પવારે બુધવારે જણાવ્યું હતું કે સરકાર બનાવવા માટે ‘INDIA’ ગઠબંધન માટે સંખ્યા એકત્ર કરવા માટે તેલુગુ દેશમ પાર્ટી (TDP) અથવા જનતા દળ યુનાઇટેડ (JDU) નો સંપર્ક કરવાના મુદ્દા પર કોઈ ચર્ચા નથી. આ જોડાણમાં હજુ સુધી કોઈ ચર્ચા થઈ નથી. તેમનું નિવેદન લોકસભા ચૂંટણીના પરિણામો પર ચર્ચા કરવા માટે આજે સાંજે અહીં કોંગ્રેસના અધ્યક્ષ મલ્લિકાર્જુન ખડગેના નિવાસસ્થાને યોજાનારી ‘INDIA’ ગઠબંધનની બેઠક પહેલા આવ્યું છે. આ બેઠકમાં એ પણ ચર્ચા થશે કે શું સરકાર બનાવવા માટે સંખ્યા એકત્ર કરવાના હેતુથી JDU અને TDPને સાથે લાવવા જોઈએ કે નહીં. લોકસભા ચૂંટણીના પરિણામો પર ટિપ્પણી કરતા, પવારે કહ્યું કે મોદી સરકારની કામગીરીથી નારાજ હોવા ઉપરાંત, વધતી જતી મોંઘવારી, ખેડૂતોની મુશ્કેલીઓ અને વધતી બેરોજગારી જેવા મુદ્દાઓને હેન્ડલ કરવાની તેમની રીતથી પણ મતદારો ગુસ્સે છે. જ્યારે તેમને ‘INDIA’ ગઠબંધન માટે સંખ્યા એકત્ર કરવા TDP અથવા JDUનો સંપર્ક કરવા વિશે પૂછવામાં આવ્યું ત્યારે તેમણે કહ્યું કે આ ગઠબંધનમાં અત્યાર સુધી આવી કોઈ ચર્ચા થઈ નથી. તેમણે કહ્યું કે, ‘અમે હજુ સુધી આ અંગે કોઈ ચર્ચા કરી નથી. તેમણે કહ્યું, ‘મારો કોઈ અંગત અભિપ્રાય નથી. પરંતુ અમે જે પણ નિર્ણય લઈશું તે સામૂહિક નિર્ણય હશે. પૂર્વ કેન્દ્રીય મંત્રી પવાર આ વિપક્ષી ગઠબંધનનો ભાવિ એક્શન પ્લાન નક્કી કરવામાં મહત્વની ભૂમિકા ભજવે તેવી શક્યતા છે. તેમની પાર્ટી રાકાંપા (શરદચંદ્ર પવાર) મહારાષ્ટ્રમાં 48 લોકસભા બેઠકોમાંથી 10 પર ચૂંટણી લડી હતી અને 8 જીતી છે.
આ પણ વાંચો – નીતિશ કુમારની માંગણીઓ થઇ ગઇ શરૂ, જાણો શું છે ડિમાન્ડ
આ પણ વાંચો – Loksabha Election Result 2024: નીતિશ અને ચંદ્રબાબુ નાયડૂનું NDA ને સમર્થન જાહેર, મોદી બનાવશે સરકાર
