Himmatnagar: હિંમતનગર (Himmatnagar)ના મોતીપુરા વિસ્તારમાં આવેલ એક વેજ અને નોનવેજની હોટલમાં સોમવારે રાત્રે આવેલા કેટલાક અસામાજીક તત્વોએ ગમે તે કારણસર ઝઘડો કરીને દેકારો મચાવી દીધો હત. ત્યારબાદ આ અસામાજીક તત્વોએ હોટલમાં તથા બહાર રખાયેલ બેસવા માટેના ખાટલા તથા ટેબલની તોડફોડ કરી દેતાં એ-ડીવીઝન પોલીસે આવીને બે અસામાજીક તત્વોને ઝડપી લીધા હતા. જે પૈકી એક ભાગી ગયો હતો જયારે હુમલાનો ભોગ બનેલ એક વ્યક્તિને સારવાર માટે મોકલી અપાયો હતો. જોકે હજુ સુધી કોઈ પોલીસ ફરીયાદ નોંધાઈ નથી.
હોટલ માલિક સાથે ઝઘડો થતા થઈ હતી બોલાચાલી
આ અંગે આધારભુત સૂત્રોમાંથી મળતી માહિતી મુજબ, સોમવારે રાત્રે મોતીપુરામાં આવેલ સોલંકી હોટલમાં રાબેતા મુજબ કેટલાક ગ્રાહકો જમવા માટે આવ્યા હતા. દરમિયાન આ વખતે ત્રણ શખ્સોએ આવીને ગમે તે કારણસર હોટલ માલિક સાથે ઝઘડો કરીને બોલાચાલી કરી હતી. ત્યારબાદ ઉશ્કેરાયેલા આ અજાણ્યા શખ્સોએ હોટલના રસોડામાં જઈને તોડફોડ કરી હતી. ઉપરાંત હોટલની બહાર મુકાયેલ ખાટલા તથા ટેબલો પણ રફેદફે કરીને નુકશાન પહોંચાડ્યુ હતુ.
ઈજા પામેલ એક વ્યક્તિને સારવાર માટે હોસ્પિટલમાં ખસેડાયો
બીજી તરફ નેશનલ હાઈવેને અડીને આવેલ આ હોટલમાં ઝઘડો થયા બાદ ચકચાર મચી ગઈ હતી. જે અંગે એ-ડીવીઝન પોલીસને જાણ થતાં પોલીસ કુમુક દોડી આવી હતી અને શંકાને આધારે બે જણાની અટકાયત કરી લીધી હતી, પરંતુ ગમે તે કારણસર પકડાયેલા પૈકી એક શખ્સ ભાગી ગયો હતો. જયારે ઈજા પામેલ એક વ્યક્તિને સારવાર માટે ખસેડાયો હતો. સમગ્ર ઘટનાના દ્રશ્યો સીસીટીવી કેમેરામાં કેદ થઈ ગયા બાદ પોલીસ વધુ તપાસ કરી રહી છે. જોકે આ ઘટના અંગે મંગળવાર સાંજ સુધીમાં કોઈ સત્તાવાર ફરીયાદ નોંધાઈ નથી.
