બ્રિજ ભૂષણ સિંહની ગણતરી દબંગ નેતાઓમાં થાય છે. તેઓ ઉત્તર પ્રદેશના ગોંડાના વતની છે અને કૈસરગંજ લોકસભા મતવિસ્તારમાંથી ભારતીય જનતા પાર્ટીના સાંસદ છે.બ્રિજ ભૂષણ શરણ સિંહ, જેઓ તેમના વિદ્યાર્થી જીવનથી રાજકીય રીતે ખૂબ જ સક્રિય હતા, તેમણે તેમની યુવાની અયોધ્યાના અખાડાઓમાં વિતાવી હતી. એક કુસ્તીબાજ તરીકે તે પોતાને ‘શક્તિશાળી’ કહે છે.તેઓ તેમના કોલેજકાળ દરમિયાન વિદ્યાર્થી સંઘના પ્રમુખ તરીકે ચૂંટાયા હતા અને તેમની સક્રિય રાજકીય કારકિર્દી અહીંથી શરૂ થઈ હતી.
લોકસભામાં છ વખત સાંસદ
1991માં પહેલીવાર લોકસભામાં ચૂંટાયેલા બ્રિજ ભૂષણ સિંહ 1999, 2004, 2009, 2014 અને 2019માં પણ લોકસભામાં ચૂંટાયા હતા.તેઓ કુલ છ વખત લોકસભામાં ચૂંટાયા છે.બ્રિજ ભૂષણ સિંહ 2011થી રેસલિંગ ફેડરેશનના પ્રમુખ પણ છે. 2019માં તેઓ ત્રીજી વખત રેસલિંગ ફેડરેશનના પ્રમુખ તરીકે ચૂંટાયા. તેઓ 1988માં ભાજપમાં જોડાયા હતા અને ત્યારબાદ 1991માં વિક્રમી મતો સાથે પ્રથમ વખત સાંસદ બન્યા હતા.
એકવાર ભાજપ છોડી પછી ફરીવાર ભાજપમાં જોડાયા
જો કે, ભારતીય જનતા પાર્ટી સાથે મતભેદોને કારણે, તેમણે પાર્ટી છોડી દીધી અને 2009ની લોકસભા ચૂંટણી કૈસરગંજથી એસપીની ટિકિટ પર જીત મેળવી. આ પછી તેઓ 2014ની લોકસભા ચૂંટણી પહેલા ફરી એકવાર ભાજપમાં જોડાયા હતા.પછીના વર્ષોમાં બ્રિજભૂષણ શરણ સિંહનું વર્ચસ્વ ગોંડા તેમજ બલરામપુર, અયોધ્યા અને આસપાસના જિલ્લાઓમાં વધ્યું અને તેઓ 1999 પછી એક પણ ચૂંટણી હાર્યા નથી.બ્રિજ ભૂષણ શરણ સિંહના પુત્ર પ્રતીક ભૂષણ પણ રાજકારણમાં છે. પ્રતિક ગોંડાથી ભાજપના ધારાસભ્ય છે.
બાબરી મસ્જિદ તોડવાના કેસમાં 40 આરોપીઓમાં હતું નામ
બીજેપીમાં જોડાયા બાદ બ્રિજભૂષણ શરણ સિંહે એક હિંદુવાદી નેતા તરીકે પોતાની ઈમેજ બનાવી હતી..1992માં અયોધ્યામાં બાબરી મસ્જિદના ઢાંચાને તોડી પાડવા માટે જવાબદાર ઠેરવવામાં આવેલા 40 આરોપીઓમાં ભાજપના દિગ્ગજ નેતા લાલ કૃષ્ણ અડવાણીની સાથે હિન્દુત્વની રાજનીતિના સ્વર સમર્થક બ્રિજ ભૂષણ સિંહનું નામ હતું. જોકે, સપ્ટેમ્બર 2020માં કોર્ટે તેમને તમામ આરોપોમાંથી મુક્ત કરી દીધા. ગોંડાના સ્થાનિક લોકો જણાવે છે કે બ્રિજ ભૂષણ સિંહ સક્રિય રાજકારણમાં આવતા પહેલા કુશ્તી સ્પર્ધાઓનું આયોજન કરતા હતા.
સ્ટેજ પર રેસલરને થપ્પડ મારી હતી
તેમને મોંઘા SUV વાહનોનો ખૂબ શોખ છે અને રાજ્યની રાજધાની લખનૌના લક્ષ્મણપુરી વિસ્તારમાં એક આલીશાન બંગલો ધરાવે છે. બ્રિઝ ભૂષણ શરણ સિંહ પર ભૂતકાળમાં હત્યા, આગચંપી અને તોડફોડના પણ આરોપ લાગ્યા હતા. ઝારખંડમાં અંડર-19 નેશનલ રેસલિંગ ચેમ્પિયનશિપ દરમિયાન તેમણે સ્ટેજ પર જ એક રેસલરને થપ્પડ મારી હતી. તે ચેમ્પિયનશિપ 15 વર્ષથી ઓછી વયની હતી અને તેમણે જે ખેલાડીને થપ્પડ મારી હતી તે 15 વર્ષથી મોટો હતો. તેથી જ આયોજકોએ તેને સ્પર્ધામાં ભાગ લેવાની મંજૂરી આપી ન હતી. આ પછી તે આ વિશે ફરિયાદ કરતા સ્ટેજ પર ગયો. ત્યારબાદ રેસલિંગ ફેડરેશન ઓફ ઈન્ડિયાના પ્રમુખ બ્રિજભૂષણ શરણ સિંહ સાથે તેની થોડી દલીલ થઈ અને તે પછી સાંસદે તેમને સ્ટેજ પર જ થપ્પડ મારી દીધી.
વિવાદીત નિવેદનોને લઇને ચર્ચામાં
2022ની વિધાનસભા ચૂંટણી પ્રચાર દરમિયાન બ્રિજભૂષણ શરણ સિંહે કહ્યું હતું કે જો તમે સમાજવાદી પાર્ટીને વોટ કરશો તો પાકિસ્તાન ખુશ થશે. તેમણે કહ્યું હતું કે “અમારી પાર્ટીમાં શક્ય છે કે અમે કલામને રાષ્ટ્રપતિ બનાવીએ. જો તમે કલામ તરીકે જ રહેશો તો તમને રાષ્ટ્રપતિ બનાવીશું… જો તમે કસાબ તરીકે આવશો તો તમને કાપી નાખવામાં આવશે.”ગયા વર્ષે નવેમ્બરમાં ગોંડામાં આયોજિત કુસ્તી સ્પર્ધા દરમિયાન તેણે અસદુદ્દીન ઓવૈસીને લઈને વિવાદાસ્પદ નિવેદન આપ્યું હતું.તેમણે કહ્યું હતું કે, “હું ખાતરી આપું છું કે ઓવૈસીના પૂર્વજો હિન્દુ હતા અને તેમના પિતાનું નામ તુલસીરામ દાસ હતું.”