VADODARA : વડોદરા જિલ્લાના (VADODARA DISTRICT) કોયલી ગામના એક પ્રગતિશીલ ખેડૂત કૌશિલ પટેલ ગાય આધારિત કુદરતી ખેતી દ્વારા તેમના અનોખા શાકભાજીના ઉત્પાદન દ્વારા ‘સ્વસ્થ જીવન માટે સ્વસ્થ આહાર’નો સંદેશ ફેલાવવાના પ્રયાસો કરી રહ્યા છે. કૌશિલભાઈ પટેલ છેલ્લા ત્રણ વર્ષથી કાળા ગાજર (BLACK CARROT) નું ઉત્પાદન કરે છે અને આ વર્ષે સફળતાપૂર્વક કાળા બટાકા અને ટામેટાંનું પણ વાવેતર કર્યું છે. કુદરતી ખેતીને લીધે શાકભાજીમાંથી કુદરતી સ્વાદ મળે છે.
કુદરતી શાકભાજીના ઉત્પાદન દ્વારા સારો આર્થિક લાભ મળવા સાથે સ્વાસ્થ્ય માટે પણ ઘણો ફાયદાકારક છે
કુદરતી શાકભાજીના સ્વાસ્થ્યલક્ષી ઘણા બધા લાભો થાય છે એમ કહેતા કૌશિલભાઈ પટેલ વધુમાં જણાવે છે કે, કુદરતી શાકભાજીના ઉત્પાદન દ્વારા સારો આર્થિક લાભ મળવા સાથે સ્વાસ્થ્ય માટે પણ ઘણો ફાયદાકારક છે. અન્ય દવાઓ પાછળ ખર્ચ કરવા કરતાં પ્રાકૃતિક ખેતી કરીને સ્વાસ્થ્યની સાથે આવક પણ જળવાઈ રહે તો પછી રાસાયણિક ખાતર કે બિયારણ વડે પાક, સ્વાસ્થ્ય અને આવક શા માટે બગાડવી..!
સેમિનારની મુલાકાત લીધા પછી હું મારા નિર્ણય પર આવ્યો કે મારે બસ પ્રાકૃતિક ખેતી જ કરવી
ખેડૂતોને કુદરતી ખેતી (ORGANIC FARMING) તરફ વળવા માટે જાગૃતિ ફેલાવતાં કૌશિલભાઈ પટેલ જણાવે છે કે, મેં ફાર્મસીમાં માસ્ટર કર્યું અને દેશભરમાં અસંખ્ય ખેડૂતોની હાટ- સેમિનારની મુલાકાત લીધા પછી હું મારા નિર્ણય પર આવ્યો કે મારે બસ પ્રાકૃતિક ખેતી જ કરવી.
જ્યુટની ખેતીથી શરૂઆત કરી હતી અને જમીનને વધુ ફળદ્રુપ બનાવવા માટે બાયોમાસ છોડ્યો
તેમણે આ મુલાકાતો દરમિયાન અન્ય ખેડૂતો પાસેથી ગાય આધારિત કુદરતી ખેતીની ટેકનિક શીખી ત્યારબાદ વડોદરા શહેર (VADODARA DISTRICT) નજીક કોયલી (KOYLI) ગામમાં જમીન ખરીદીને કુદરતી ખેતી તરફ વળવાનું નક્કી કર્યું. “મેં જ્યુટની ખેતીથી શરૂઆત કરી હતી અને જમીનને વધુ ફળદ્રુપ બનાવવા માટે બાયોમાસ છોડ્યો. મુખ્ય ઉદ્દેશ્ય મારા પોતાના વપરાશ માટે ઉગાડવાનો છે અને હું મારા ખેતરમાં શાકભાજી ઉગાડવાની યોજનાને વળગી રહ્યો છું. સમય જતાં આ ખેતી મને બિઝનેસ મોડલ સાથે આગળ વધવાનો વિચાર આપે છે. હું તેને વ્યવસાયિક રીતે સધ્ધર બનાવવા માટે અન્ય શાકભાજીની અલગ અલગ જાતોનો સમાવેશ કરવાનું શરૂ કરું છું. હું ગુલાબી, કાળા, પીળા રંગમાં ગાજર, કાળા અને લાલ રંગમાં બટાકા, કાળા, જાંબલી, ગ્રેપવાઈન, લાલ રંગમાં અને ચેરી અને અંડાકાર જેવા વિવિધ આકારોમાં ટામેટાંનું ઉત્પાદન કરું છું.”
કાળા બટાકા અને કાળા ટામેટાંનું સફળ રીતે ઉત્પાદન કર્યું
આ વર્ષે તેમણે કાળા ગાજર, કાળા બટાકા અને કાળા ટામેટાંનું સફળ રીતે ઉત્પાદન કર્યું છે. ટામેટાંની લગભગ ૨૨ જાતો, ૧૨ જાતના ગોળાઓ, ૧૨ જાતના રીંગણ, લાલ પેગોન વટાણા, લાલ જમ્બો લસણ, વેલ્વેટ કઠોળ, લાલ ભીંડા, કાળી હળદર, વાદળી હળદર તથા અન્ય ઘણી અનેકાવિધ શાકભાજીઓનું વાવેતર કર્યું છે.
સોશિયલ મીડિયા મને પ્રગતિશીલ ખેડૂતો સાથે જોડાવા અને કુદરતી ખેતીની અનોખી તકનીકો શીખવામાં ઘણી મદદ કરે છે
આ શાકભાજીના દેખાવ તેમજ સ્વાદમાં ઘણો ફરક હોય છે. વધુમાં જણાવે છે કે, “મેં ૨૦૧૯ થી ગાય આધારિત કુદરતી ખેતીની શરૂઆત કરી હતી અને હું તેમાં જ વિશ્વાસ રાખું છું. મારા બંને ખેતરોમાં કાપણીની તકનીકનો ઉપયોગ કરું છું અને દર વર્ષે સારા ઉત્પાદન સાથે લાભ લઉં છું. હું આ ખેતીથી ગૌરવ અનુભવું છું. તેમજ સમગ્ર ભારતમાં આયોજિત ખેડૂત હાટમાંથી લાવવામાં આવતી વિવિધ શાકભાજીની જાતોના મૂળ/દેશી બીજ ખેતી અને વાવણીના જૈવવિવિધતાના વિચારમાં માનું છું. સોશિયલ મીડિયા મને પ્રગતિશીલ ખેડૂતો સાથે જોડાવા અને કુદરતી ખેતીની અનોખી તકનીકો શીખવામાં ઘણી મદદ કરે છે. હું મોનો કલ્ચર ફૂડ ખાવાની આદતોની તરફેણમાં નથી અને તેના બદલે અમારી પ્લેટમાં વિવિધ જાતોનો સમાવેશ કરવા પર ધ્યાન કેન્દ્રિત કરું છું.” કાળા ગાજર તેના ઔષધિય ફાયદાઓને કારણે ખૂબ માંગમાં છે અને તેઓએ પોતાની સુભાનપુરા સ્થિત શોપ ગૌ ભારત ઓર્ગેનિક સ્ટોરમાં વેચે છે તથા મૈસુર, મુંબઈ, અમદાવાદ અને નાસિક જેવા શહેરોમાં પણ પહોંચાડે છે. મલ્ટી-ડાયવર્સિટી ફાર્મિંગના તેમના વિચાર સાથે તેઓ તેમના ફાર્મના દરેક ખૂણે કુદરતી રીતે ઉગાડવામાં આવતી શાકભાજી અને મસાલાઓનો ઉપયોગ કરે છે.
કોયલી ખાતે આવેલ ખેતરમાં મુલાકાત માટે આમંત્રણ
કૌશિલભાઈ પટેલ ભવિષ્યમાં લાલ આદુ, જાંબલી લાલ શક્કરિયાની ખેતી કરવાનું આયોજન કરી રહ્યા છે, તેઓ અન્ય ખેડૂતો પણ કુદરતી ખેતી તરફ આગળ વધે તેના માટે જાગૃતિ પણ ફેલાવી રહ્યા છે સાથે જ તેમને તેમના કોયલી ખાતે આવેલ ખેતરમાં મુલાકાત માટે આમંત્રણ આપે છે તેમજ ત્યાં આવી અનેકાવિધ શાકભાજી તેમજ ફળોના જાદુનો અનુભવ કરવા પ્રેરિત કરે છે.
આ પણ વાંચો — VADODARA : મંગાવ્યો મોબાઇલ અને મળ્યો સાબુ..વાંચો અહેવાલ