સંયુક્ત રાષ્ટ્રની પરમાણુ એજન્સીએ કહ્યું છે કે ઈરાને દેશમાં મળી આવેલી પરમાણુ સામગ્રીની તપાસનો કોઈ ભરોસાપાત્ર જવાબ આપ્યો નથી અને કહ્યું છે કે ઈરાને યુરેનિયમનો ભંડાર જમા કરી રહ્યો છે અને સરળતાથી પરમાણુ બોમ્બ બનાવી શકે છે. અહેવાલો અનુસાર સંયુક્ત રાષ્ટ્રના દેશો ઈરાનના પરમાણુ કાર્યક્રમને લઈને ચિંતિત છે. 2015ના પરમાણુ કરારને પુનર્જીવિત કરવાની વાતચીત અટકી ગઈ છે. મોટા ભાગના આંતરરાષ્ટ્રીય પ્રતિબંધો હટાવવાના બદલામાં આ સોદામાં ઈરાનના પરમાણુ કાર્ય પર સખત પરંતુ અસ્થાયી પ્રતિબંધો લાદવામાં આવ્યા હતા. અમેરિકાએ 2018 માં પરમાણુ કરારમાંથી પીછેહઠ કરી ત્યારથી ઈરાને તેના પરમાણુ કાર્યક્રમમાં વધારો કર્યો છે, જેમાં શસ્ત્રો-ગ્રેડ સામગ્રીની નજીકના 60 ટકા જેટલા સમૃદ્ધ યુરેનિયમનું ઉત્પાદન શામેલ છે.
અમેરિકા દ્વારા પરમાણુ કરારમાંથી ખસી જવાને કારણે ઈરાનમાં મળેલી પરમાણુ સામગ્રીની તપાસ પર પ્રતિબંધ મુકવામાં આવ્યો હતો. તે ઘણા વર્ષો પહેલા ઈરાન દ્વારા કરવામાં આવેલા પરમાણુ હથિયારો પરના કામ સાથે સંબંધિત હોવાનું ઘણા નિષ્ણાતો માને છે. આવતા મહિને ઇન્ટરનેશનલ એટોમિક એનર્જી એજન્સીના સદસ્ય દેશોના બોર્ડમાં ઝઘડા થવાના અહેવાલો છે. ઈરાન ઈચ્છે છે કે એજન્સીની તપાસ આવતા મહિને બંધ થઈ જાય.
પરમાણુ વાટાઘાટોમાં સામેલ પશ્ચિમી રાજદ્વારીઓ અનુસાર, ઈરાની અધિકારીઓએ કહ્યું છે કે તપાસને સમાપ્ત કરવામાં નિષ્ફળતા પરમાણુ કરારને પુનર્જીવિત કરવાના પ્રયત્નોને જટિલ બનાવી શકે છે. એજન્સીએ પરમાણુ સામગ્રી અંગેના પ્રશ્નોના જવાબ આપવામાં ઈરાનની સતત નિષ્ફળતાની આકરી ટીકા કરી છે. વોશિંગ્ટન હજુ પણ પરમાણુ કરારને પુનઃજીવિત કરવા માટે ઈરાન સાથે ડીલ ઈચ્છી રહ્યું છે. ઈરાને કહ્યું છે કે તેનો પરમાણુ કાર્યક્રમ હંમેશા શાંતિપૂર્ણ હેતુઓ માટે જ રહ્યો છે.
વોલ સ્ટ્રીટ જર્નલે એવા અહેવાલોને ટાંક્યા છે કે ઈરાને 43.3 કિલો યુરેનિયમનો સંગ્રહ કર્યો છે. ઈરાને છેલ્લા ત્રણ મહિનામાં 10 કિલો યુરેનિયમનો સંગ્રહ કર્યો છે. નિષ્ણાતો કહે છે કે ઈરાનનો 43.3 કિલોગ્રામનો ભંડાર હવે નિર્ધારિત જથ્થા કરતાં વધારે છે જે જણાવે છે કે પરમાણુ હથિયાર માટે કેટલી પરમાણુ સામગ્રીની જરૂર પડી શકે છે. નિષ્ણાતો કહે છે કે ઈરાનને 43 કિલોથી 66 કિલોગ્રામ સુધી પહોંચવામાં થોડા અઠવાડિયા લાગશે.
