Mrs.P. Bharthi held Press Conference: ગુજરાતમાં આજે લોકશાહીના મહાપર્વની ખુબ ધામધુમથી ઉજવણી કરવામાં આવી હતી. ગુજરાતના લોકોએ મતદાનને લઈને પોતાનો અનોખો ઉત્સાહ દેખાડ્યો છે. તમામ મતદાન મથક પર શાંતિપૂર્ણ રીતે મતદાન થયું હોવાની વિગતો સામે આવી છે. નોંધનીય છે કે, ગુજરાતની 25 લોકસભા બેઠક પર મતદાન પૂર્ણ થઈ ગયું છે. આજે ચાર કેન્દ્રીય મંત્રી, એક પ્રદેશ પ્રમુખનું ભાવિ EVMમાં કેદ થઈ ગયું છે. હવે બધા લોકોની નજર ચૂંટણીના પરિણામ પર રહેવાની છે. ગુજરાતમાં 5 વાગ્યા સુધી રાજ્યમાં સરેરાશ 55 ટકાથી વધુ મતદાન થયા હોવાની વિગતો સામે આવી છે. ગુજરાતમાં 19 મહિલા સહિત 266 ઉમેદવારનું ભાવિ EVMમાં કેદ થયું છે. ચૂંટણી પંચના જણાવ્યા અનુસાર રાતના 12 વાગ્યા સુધીમાં સંપૂર્ણ મતદાનના ફાઈનલ આંકડા સામે આવશે. ઉલ્લેખનીય છે કે, 5 વિધાનસભા બેઠકની પેટાચૂંટણીનું મતદાન પૂર્ણ થયું છે. આ બાબતે વિગતો આપતા Mrs.P. Bharthi એ Press Conference યોજી હતી.
5.00 વાગ્યા સુધીમાં સરેરાશ 55.22 ટકા મતદાન થયું
મુખ્ય નિર્વાચન અધિકારી શ્રીમતી પી. ભારતીએ જણાવ્યું હતું કે, સમગ્ર રાજ્યમાં સવારથી જ શાંતિપૂર્ણ માહોલમાં મતદાન થયું હતું. રાજયના તમામ સંસદીય મતવિભાગોમાં મતદાનની પ્રક્રિયા સરળતાથી અને સુપેરે પૂર્ણ થઇ છે. રાજ્યના વિશિષ્ટ પ્રકારના મતદાન મથકો આકર્ષણનું કેન્દ્ર બન્યા હતા. સાંજે 5.00 વાગ્યા સુધીમાં રાજ્યની 25 લોકસભા બેઠક પર સરેરાશ 55.22 ટકા તથા વિધાનસભાની 05 બેઠકો પર 56.56 ટકા મતદાન થયું છે. મતદાન આજે સાંજે 6:00 વાગે સંપન્ન થયું હતું. આજે મોડી રાત્રે 12 વાગ્યે ચોક્કસ ટકાવારી જાણી શકાશે.
મોડી રાત્રે 12 વાગ્યે ચોક્કસ ટકાવારી જાણી શકાશે
મુખ્ય નિર્વાચન અધિકારીશ્રીએ વધુમાં કહ્યું હતું કે, રાજયના 25 સંસદીય મતવિભાગોના 49,140 મતદાન મથકો પૈકી 1,820 મતદાન મથકોમાં 2 BUs નો ઉપયોગ કરવામાં આવ્યો હતો. મતદાન દરમિયાન સાંજના 5.00 કલાક સુધીમાં 116 એટલે કે 0.23 % BU, 114 એટલે કે 0.23 % CU અને 383 એટલે કે 0.78 % VVPAT બદલવામાં આવ્યા હતા. તમામ જિલ્લાઓમાં ઝોનલ ઓફિસર કે જે તે વિસ્તારના ઇન્ચાર્જ પાસે રિઝર્વ મશીન સેટ ઉપલબ્ધ રાખવામાં આવ્યા હતા. જ્યાં પણ નાની મોટી સમસ્યા સર્જાઈ, ત્યાં ત્વરિત EVMના બેલેટ યુનિટ, કંટ્રોલ યુનિટ કે વીવીપેટ યુનિટ રિપ્લેસ કરવામાં આવ્યા છે.
જાણો, ગુજરાતમાં 5 વાગ્યા સુધી સરેરાશ મતદાન#Gujarat #LoksabhaElection2024 #Election2024 #GujaratFirst pic.twitter.com/pyVx8s5R2d
— Gujarat First (@GujaratFirst) May 7, 2024
ઇન્ચાર્જ પાસે રિઝર્વ મશીન સેટ ઉપલબ્ધ રખાયા હતાઃ મુખ્ય નિર્વાચન અધિકારી
તારીખ 7 મે ના રોજ મતદાનના કલાકો દરમિયાન ભારતના ચૂંટણી પંચ દ્વારા 8 એલર્ટ્સ મળી હતી. જેમાં EVM અંગેના 3 એલર્ટ્સ, આદર્શ આચારસંહિતા ભંગની 1 તથા અન્ય 4 એલર્ટ્સ હતી. c-VIGILના માધ્યમથી મતદાનના દિવસે 186 તથા આદર્શ આચારસંહિતા સમયગાળાની શરૂઆતથી પ્રિ-પોલ ડે સુધીમાં કુલ 5,118 ફરિયાદો મળી કુલ 5,315 ફરિયાદો મળી છે. National Grievance Service Portal માધ્યમથી મતદાનના દિવસે 759 ફરિયાદ તથા આદર્શ આચારસંહિતા સમયગાળાની શરૂઆતથી પ્રિ-પોલ ડે સુધીમાં 15,581 મળી અત્યાર સુધીમાં કુલ 16,340 ફરિયાદો મળી છે.
મતદાન દરમિયાન કુલ 92 ફરિયાદો મળી હતી
મતદાનના દિવસે મુખ્ય નિર્વાચન અધિકારીશ્રીની કચેરી ખાતે કંટ્રોલરૂમ સહિત EVM સંબંધી 11, આદર્શ આચારસંહિતા સંબંધી 21 તથા બોગસ વોટીંગ, કાયદો વ્યવસ્થા, ક્રાઉડીંગ વગેરે અંગે 18 અને અન્ય 42 મળી કુલ 92 ફરિયાદો મળી છે. અન્ય માધ્યમો થકી તા. 6 મે સુધી 2,384 મળી અત્યાર સુધીમાં કુલ 2,476 ફરિયાદો મળી છે. આમ કુલ 24,131 ફરિયાદો મળી છે. પ્રાથમિક માહિતી પ્રમાણે ભરૂચના કેસર, સુરતના સણધરા તેમજ બનાસકાંઠાના ભાખરી ગામે ગ્રામજનોએ મતદાનનો સંપૂર્ણ બહિષ્કાર કર્યો હોવાની જાણકારી મળી છે. જ્યારે માંગરોળના ભાટગામ તથા બાલાસિનોરના બોડોલી અને પુંજરા ગામે આંશિક બહિષ્કારની જાણકારી મળી છે.
25,000 જેટલા મતદાન મથકો ખાતેથી વૅબ કાસ્ટીંગ થયું
શ્રીમતી પી. ભારતીએ જણાવ્યું વધુમાં કહ્યું કે, પારદર્શક ચૂંટણી યોજવાના નિર્ધાર સાથે રાજ્યના 25,000 જેટલા મતદાન મથકો ખાતેથી વૅબ કાસ્ટીંગ કરવામાં આવ્યું હતું. જ્યાં ફરિયાદો મળી હતી તે મતદાન મથકોનું વેબ કાસ્ટીંગ થકી ક્રોસ વેરિફિકેશન પણ કરવામાં આવ્યું હતું. મુખ્ય નિર્વાચન અધિકારી શ્રીમતી પી. ભારતીએ પોલીંગ સ્ટાફની પ્રશંસા કરતાં જણાવ્યું હતું કે, લગભગ 40 થી 41 ડિગ્રીની ગરમીમાં પણ મતદાન સ્ટાફે ખૂબ જ નિષ્ઠાથી ફરજ નિભાવી છે તે બદલ તેમણે મતદાન સ્ટાફ તથા તેમના પરિવારજનોનો આભાર પ્રગટ કર્યો હતો. આ Press Conference માં મુખ્ય નિર્વાચન અધિકારીએ અનેક વિગતોની જાણકારી આપી હતી.
