ચેસ પોતાનું જન્મસ્થળ છોડી દુનિયાભરમાં છાપ છોડી રહી છે, તે ગર્વની વાત : નરેન્દ્ર મોદી

વડાપ્રધાન નરેન્દ્ર મોદીએ આજે ઈન્દિરા ગાંધી સ્ટેડિયમ ખાતે 44મા ચેસ ઓલિમ્પિયાડની મશાલ રિલેનું ઉદ્ઘાટન કર્યું. 44માં ચેસ ઓલિમ્પિયાડના કાર્યક્રમ દરમિયાન વડાપ્રધાન નરેન્દ્ર મોદીએ કહ્યું કે આજે ચેસ ઓલિમ્પિયાડની રમત માટે પ્રથમ મશાલ રિલે ભારતમાંથી શરૂ થઈ રહી છે. આ વર્ષે પ્રથમ વખત ભારત પણ આ રમતનું આયોજન કરવા જઈ રહ્યું છે.

પીએમ મોદીએ કહ્યું કે અમને ગર્વ છે કે એક રમત પોતાની જન્મભૂમિ છોડીને આખી દુનિયામાં છાપ છોડી રહી છે. વડાપ્રધાન નરેન્દ્ર મોદીએ કહ્યું કે ભારતની સદીઓ પહેલા આ રમતની મશાલ ચતુરંગાના રૂપમાં આખી દુનિયામાં ગઈ હતી. આજે ચેસની પ્રથમ ઓલિમ્પિયાડની મશાલ પણ ભારતમાંથી નીકળી રહી છે. આજે જ્યારે ભારત તેની આઝાદીના 75મા વર્ષ અમૃત મહોત્સવની ઉજવણી કરી રહ્યું છે, ત્યારે આ ચેસ ઓલિમ્પિયાડની મશાલ દેશના 75 શહેરોમાં પણ જશે.

નરેન્દ્ર મોદીએ કહ્યું કે FIDEએ પણ નક્કી કર્યું છે કે દરેક ચેસ ઓલિમ્પિયાડ રમત માટે ટોર્ચ રિલે ભારતથી જ શરૂ થશે. આ સન્માન માત્ર ભારતનું સન્માન નથી, પરંતુ ચેસના આ ભવ્ય વારસાનું પણ સન્માન છે. હું આ માટે FIDE અને તેના તમામ સભ્યોને અભિનંદન આપું છું.

વડાપ્રધાને કહ્યું કે જેમ ચેસના દરેક પ્યાદાની પોતાની આગવી તાકાત હોય છે, તેની એક અનોખી ક્ષમતા હોય છે. જો તમે પ્યાદા સાથે યોગ્ય ચાલ ચાલો છો, તેની શક્તિનો યોગ્ય રીતે ઉપયોગ કરો છો તો તે સૌથી શક્તિશાળી બને છે. ચેસબોર્ડની આ વિશેષતા આપણને જીવનનો મોટો સંદેશ આપે છે. જો યોગ્ય ટેકો અને યોગ્ય વાતાવરણ આપવામાં આવે તો, સૌથી નબળા લોકો માટે પણ કોઈ લક્ષ્ય અશક્ય નથી.

પીએમ મોદીએ કહ્યું કે આપણા દેશમાં ટેલેન્ટની કોઈ કમી નથી. દેશના યુવાનોમાં હિંમત, સમર્પણ અને ક્ષમતાની કોઈ કમી નથી. અગાઉ આપણા આ યુવાનોએ યોગ્ય પ્લેટફોર્મ માટે રાહ જોવી પડી હતી. આજે ‘ખેલો ઈન્ડિયા’ ઝુંબેશ હેઠળ દેશ પોતે આ પ્રતિભાઓને શોધી રહ્યો છે. અમને ગર્વ છે કે એક રમત, જે પોતાનું જન્મસ્થળ છોડીને સમગ્ર વિશ્વમાં પોતાની છાપ છોડી રહી છે, તે ઘણા દેશો માટે પેશન બની ગઈ છે.