Delhi Water Crisis : દેશની રાજધાની દિલ્હીમાં લોકો જળસંકટનો સામનો કરી રહ્યા છે. આ સમસ્યા આજની નથી છેલ્લા ઘણા સમયથી દિલ્હીની જનતાને પાણીની તકલીફોનો સામનો કરવો પડી રહ્યો છે. આ મામલે ઘણું રાજકારણ પણ થઇ રહ્યું છે. ભાજપથી લઈને કોંગ્રેસના નેતાઓ દિલ્હીની આમ આદમી પાર્ટી સરકારને ઘેરી રહ્યા છે અને પાણીની સમસ્યાના ઉકેલમાં ઉદાસીન હોવાનો આરોપ લગાવી રહ્યા છે. ઘણા વિસ્તારોમાં પાણીના ટેન્કરો સપ્લાય કરવામાં આવતા હતા તે હવે ઘટીને અડધા થઈ ગયા છે. તેનું કારણ ટેન્કરોની અછત હોવાનું કહેવાય છે, જેના કારણે પાણી પુરવઠામાં સમસ્યા છે.
NDMCએ એલર્ટ જાહેર કર્યું
દેશના ઘણા રાજ્યોમાં આ દિવસોમાં ભારે ગરમી પડી રહી છે. ખાસ કરીને દિલ્હીની જો વાત કરીએ તો અહીં કાળઝાળ ગરમી અને જળ સંકટને કારણે લોકોનું જીવન મુશ્કેલ બની ગયું છે. દિલ્હીમાં પાણીનું સંકટ સતત વધી રહ્યું છે. ગીતા કોલોની, વસંત વિહાર, ઓખલા જેવા અસંખ્ય વિસ્તારોમાં પાણીની તીવ્ર તંગી છે. અહીં લોકો ટેન્કરને જોઈને તેની તરફ દોડી રહ્યા છે. જળ સંકટને કારણે દિલ્હી સરકારે પાણી પુરવઠામાં જોરદાર કાપ મૂક્યો છે, જેના કારણે લોકોની મુશ્કેલીઓ વધુ વધી રહી છે. દરમિયાન NDMCએ VIP વિસ્તારો માટે એડવાઈઝરી જારી કરી છે. જે મુજબ હવે દિલ્હીના VIP વિસ્તારોમાં પણ માત્ર એક જ વાર પાણી મળશે. NDMC વિસ્તારમાં 40% પાણીની અછત છે. મળતી માહિતી મુજબ, વોટર બોર્ડ પૂરેપૂરું પાણી આપી રહ્યું નથી. દિલ્હીમાં દરરોજ 916 MGD પાણીનું ઉત્પાદન થઈ રહ્યું છે. દિલ્હીને દરરોજ અંદાજે 1000 MGD પાણીની જરૂર પડે છે. તેમજ VVIP વિસ્તારોમાં પાણીની અછત છે, અહીં પણ પાણી માત્ર એક જ વાર આવે છે.
ચાણક્યપુરી વિસ્તારમાં કેવી સ્થિતિ?
ચાણક્યપુરી વિસ્તારના સંજય કેમ્પમાં, લોકો સવારે 6:00 થી તેમના તમામ કામ છોડીને પાણી માટે લાઇનમાં ઉભા રહેવાનું શરૂ કરે છે અને 8:00 વાગ્યે પાણીનું ટેન્કર આવે છે, ત્યારબાદ લોકો પાણી માટે દોડતા જોવા મળી જાય છે. આ લોકો પાણી માટે એકબીજા સાથે લડતા પણ જોવા મળે છે અને ટેન્કરની અંદર પાઈપ નાખવા માટે સંઘર્ષ કરે છે અને 5 મિનિટમાં ટેન્કર ખાલી થઈ જાય છે. આ સમયગાળા દરમિયાન, કેટલાક લોકો પાણી મેળવવામાં સક્ષમ દેખાય છે જ્યારે અન્યને નિરાશાનો સામનો કરવો પડે છે. આ સાથે જ સાંજે 4:00 વાગ્યે બીજું ટેન્કર આવશે, ત્યાં સુધી જે લોકોને પાણી નથી મળતું તેમની જિંદગી કેવી અલગ હશે તે અનુભવી શકાય છે.
લોકો પરેશાન
અહીં મોટા ભાગના મજૂરો રહે છે પરંતુ પાણીની સમસ્યાને કારણે લોકો પરેશાન થઇ ગયા છે કે કામ પર જાય કે પછી પાણી માટે લાઇનમાં ઉભા રહે. અહીં દરેક પરિવારમાંથી એક વ્યક્તિની ફરજ છે કે તે સવારે 6 વાગે પાણીનો ડબ્બો અને પાઇપ લઈને લાઈનમાં ઉભા રહે. દિલ્હી સરકારે પાણી પુરવઠામાં કાપ મૂક્યો હોવાથી આ સ્થિતિ સર્જાઈ છે. અગાઉ અહીં સવારે બે ટેન્કર મોકલવામાં આવતા હતા, પરંતુ હવે એક જ ટેન્કર મોકલવામાં આવી રહ્યું છે, જેના કારણે તમામ લોકોને પાણી મળતું નથી.
આ પણ વાંચો – દિલ્હી એરપોર્ટ પર વીજળી ગુલ, તમામ કામગીરી ઠપ્પ, મુસાફરોને ભારે મુશ્કેલી
આ પણ વાંચો – ‘ટેન્કર માફિયા સામે શું પગલાં લીધાં?’ SC એ દિલ્હી સરકારને લગાવી ફટકાર…