વેસ્ટ ઈન્ડિઝની ટીમ ભારતમાં યોજાનારા ICC ક્રિકેટ વર્લ્ડ કપ 2023 માટે ક્વોલિફાય થઈ શકી નથી. સ્કોટલેન્ડે શનિવારે (1 જુલાઈ) હરારેમાં રમાયેલી વર્લ્ડ કપ ક્વોલિફાયર્સની મહત્વપૂર્ણ મેચમાં વેસ્ટ ઈન્ડિઝને સાત વિકેટે હરાવ્યું હતું. આ મેચમાં વેસ્ટ ઈન્ડિઝે સ્કોટિશ ટીમને માત્ર 182 રનનો ટાર્ગેટ આપ્યો હતો, જેને તેણે સરળતાથી હાંસલ કરી લીધો હતો. આ પહેલીવાર હશે જ્યારે બે વખતની ચેમ્પિયન વેસ્ટ ઈન્ડિઝ ODI વર્લ્ડ કપમાં ભાગ નહીં લે.
વેસ્ટઇન્ડિઝે અત્યાર સુધીના તમામ 12 વર્લ્ડકપમાં ભાગ લીધો છે
અગાઉ વેસ્ટ ઈન્ડિઝે વર્લ્ડ કપની તમામ 12 આવૃત્તિઓમાં ભાગ લીધો હતો. વેસ્ટ ઈન્ડિઝની ટીમ 1975 અને 1979ના વર્લ્ડ કપમાં ચેમ્પિયન બની હતી, અને ત્યારપછીના 1983ના વર્લ્ડકપમાં પણ તેણે ફાઇનલમાં પ્રવેશ કર્યો હતો. આ વખતે ક્વોલિફાઈંગ ટૂર્નામેન્ટ દરમિયાન વેસ્ટ ઈન્ડિઝ એવી ટીમ જેવી લાગી ન હતી જે વર્લ્ડ કપમાં જવા માટે બેતાબ હતી. ક્વોલિફાયરની પાંચેય મેચોમાં શાઈ હોપની આગેવાની હેઠળની ટીમનું મનોબળ નીચું જોવા મળ્યું હતું. વેસ્ટ ઈન્ડિઝના ખરાબ પ્રદર્શન પાછળ ઘણા કારણો હતા.
ખરાબ ફિલ્ડીંગ
વેસ્ટ ઈન્ડિઝની ટીમની ફિલ્ડિંગ ખૂબ જ ખરાબ હતી. યુએસએ સામેની શરૂઆતની મેચમાં ગજાનંદ સિંહે 0ના સ્કોર પર જીવતદાન મેળવ્યું હતું, અને અણનમ 101 રન બનાવ્યા હતા. ઝિમ્બાબ્વે સામેની મેચમાં તો ચાર કેચ ડ્રોપ કર્યા જે ખૂબ જ ભારે પડ્યા. તે મેચમાં સિકંદર રઝાને 1 અને 3ના અંગત સ્કોર પર જીવતદાન મળ્યું અને તેણે 68 રન બનાવ્યા. રઝાએ રેયાન બર્લ સાથે 87 રનની ભાગીદારી કરી હતી. બર્લને પણ એક જીવતદાન મળ્યુ હતું.. કોચ ડેરેન સેમી એટલા નિરાશ થયા હતા કે તેમણે વેસ્ટ ઈન્ડિઝને ‘સૌથી ખરાબ ફિલ્ડિંગ સાઇડ’ ગણાવી. સ્કોટલેન્ડ સામેની મેચમાં બ્રૈંડન મેકમુલનનો કેચ કાઇલ મેયર્સે છોડ્યો હતો, જ્યારે તે માત્ર 21 રન બનાવીને બેટિંગ કરી રહ્યો હતો.
ઈજાઓ અને વિચિત્ર રણનીતિઃ
પ્રથમ ત્રણ મેચમાં વેસ્ટ ઈન્ડિઝે જ્હોનસન ચાર્લ્સને 3 નંબર પર બેટિંગ કરાવી હતી, જ્યારે હકીકત એ છે કે તે એક સારો ઓપનર છે. ઇનફોર્મ ખેલાડી યાનિક કારિયા ઈજાને કારણે ટૂર્નામેન્ટની શરૂઆત પહેલા જ ઈજાગ્રસ્ત થઈ ગયો હતો, જેના કારણે ટીમમાં કોઈ લેગ-સ્પિનર બચ્યો ન હતો. વિશ્વ કપ ક્વોલિફાયરમાં વાનિન્દુ હસરંગા અને ક્રિસ ગ્રીવ્સે જે રીતે પ્રદર્શન કર્યું છે તે દર્શાવે છે કે ટીમમાં લેગ સ્પિનર હોવું ખૂબ જ ફાયદાકારક સાબિત થયું હોત. શમરાહ બ્રુક્સ પણ બીમારીના કારણે કેટલીક મેચોમાં રમી શક્યો નહોતો.
હોલ્ડર તરફથી સુપર ઓવરમાં બોલિંગઃ
નેધરલેન્ડ સામે વેસ્ટ ઈન્ડિઝની મેચ ડ્રોમાં સમાપ્ત થયા બાદ સુપર ઓવરનો આશરો લેવામાં આવ્યો હતો, જેમાં વેસ્ટ ઈન્ડિઝને હારનો સામનો કરવો પડ્યો હતો. નેધરલેન્ડ્સ સામે સુપર ઓવરમાં બોલિંગ કરવા માટે અલ્ઝારી જોસેફ કરતાં જેસન હોલ્ડરને પસંદ કરવામાં આવ્યો હતો, જે ખૂબ જ આઘાતજનક નિર્ણય હતો. હોલ્ડરે સુપર ઓવરમાં કુલ 30 રન લૂંટાવ્યા હતા. હોલ્ડરે લોગન વાન બીક સામે બે ફુલ ટોસ સાથે શરૂઆત કરી, પછીના બોલ પણ શોર્ટ અને વાઇડ નાંખ્યા . અહીં,જો હોલ્ડરે યોર્કરનો પ્રયાસ કર્યો હોત તો પરિણામ કંઇક અલગ આવી શક્યું હોત
તૈયારીનો અભાવ:
વેસ્ટ ઈન્ડિઝે વર્લ્ડ કપ ક્વોલિફાયર્સની તૈયારી માટે સંયુક્ત આરબ અમીરાતમાં યજમાન ટીમ સામે ત્રણ મેચની ODI શ્રેણી રમી. પરંતુ આશ્ચર્યજનક વાત એ હતી કે તે ODI શ્રેણી માટે છ ખેલાડીઓ – કાયલ મેયર્સ, જેસન હોલ્ડર, રોવમેન પોવેલ, અલઝારી જોસેફ, રોમારિયો શેફર્ડ અને અકીલ હુસૈનને આરામ આપવામાં આવ્યો હતો. આ તમામ ખેલાડીઓ કોઈપણ તૈયારી વિના વર્લ્ડ કપ ક્વોલિફાયર રમવા સીધા ઝિમ્બાબ્વે ગયા હતા.
ખરાબ શોટ સિલેક્શનઃ
વેસ્ટ ઈન્ડિઝના બેટ્સમેનોની શોટ સિલેક્શન પણ સવાલોના ઘેરામાં હતી. પ્રથમ બે મેચમાં વાઇસ-કેપ્ટન રોવમેન પોવેલ જે પ્રકારનો શોટ આઉટ થયો તે આશ્ચર્યજનક હતો. આ પછી પોવેલને આગામી ત્રણ મેચો માટે પ્લેઈંગ ઈલેવનમાં પસંદ કરવામાં આવ્યો ન હતો. બાકીના બેટ્સમેનોનું પ્રદર્શન પણ સારુ નહોતું અને તેમાંથી મોટાભાગના ખેલાડીઓએ ખરાબ શોટ રમીને પોતાની વિકેટ ભેટમાં આપી હતી. સ્કોટલેન્ડ સામેની મેચમાં પણ આ દ્રશ્ય જોવા મળ્યું હતું
