લોકસભા સામાન્ય ચૂંટણી-2024 (Lok Sabha Election) તથા ગુજરાત વિધાનસભાની પેટા ચૂંટણીઓની મતગણતરી સંદર્ભે મુખ્ય નિર્વાચન અધિકારી પી. ભારતીની અધ્યક્ષતામાં વીડિયો કૉન્ફરન્સના માધ્યમથી સમીક્ષા બેઠક યોજાઈ હતી. આ બેઠકમાં સ્ટેટ પોલીસ નોડલ ઑફિસર તથા તમામ જિલ્લા ચૂંટણી અધિકારીઓ સાથે રાજ્યનાં 25 મતગણતરી કેન્દ્રો પર 4 જૂન, 2024 ના રોજ યોજાનાર મતગણતરી માટેની વ્યવસ્થાઓ અંગે સમીક્ષા કરવામાં આવી હતી. ઉપરાંત, ગઈકાલે ECI દ્વારા પણ મતગણતરી સંદર્ભે સમીક્ષા બેઠક યોજાઈ હતી.
મુખ્ય નિર્વાચન અધિકારી પી. ભારતીએ (P. Bharti) જણાવ્યું હતું કે, રાજ્યના તમામ મતગણતરી મથકોએ આવશ્યક તૈયારીઓ પૂર્ણ કરી દેવાઈ છે. 4 જૂન, 2024 ના રોજ સવારે 8 વાગે સમગ્ર રાજ્યમાં 25 મતગણતરી કેન્દ્રો પર કામગીરી શરૂ કરાશે. આણંદ લોકસભા મતવિસ્તારમાં 02 મતગણતરી કેન્દ્રો જ્યારે અન્ય તમામ લોકસભા મતવિસ્તારના એક-એક મતગણતરી કેન્દ્રો પર એકસાથે મત ગણતરી શરૂ કરાશે.
મતગણતરીની તૈયારીઓને આખરી ઓપ
તેમણે જણાવ્યું હતું કે, સમગ્ર કાઉન્ટિંગ પ્રોસેસ માટે 56 કાઉન્ટિંગ ઓબ્ઝર્વર્સ, 30 ચૂંટણી અધિકારી અને 180 મદદનીશ ચૂંટણી અધિકારી ફરજ બજાવશે. ઉપરાંત, અંદાજે 614 વધારાના મદદનીશ ચૂંટણી અધિકારીઓને પોસ્ટલ બેલેટ અને ઇલેક્ટ્રોનિકલી ટ્રાન્સમિટેડ પોસ્ટલ બેલેટ સિસ્ટમ માટે જવાબદારી સોંપવામાં આવી છે. 2 જૂન સુધીમાં મતગણતરી માટેના તમામ ઑબ્ઝર્વર્સ ફરજ સ્થળ પર હાજર થઈ જશે. પી. ભારતીએ જણાવ્યું હતું કે, મતગણતરી સ્ટાફનું પહેલું રેન્ડમાઈઝેશન એક અઠવાડિયા પહેલા, બીજું રેન્ડમાઈઝેશન મતગણતરીના 24 કલાક પહેલા અને ત્રીજું મતગણતરીના દિવસે વહેલી સવારે 5 વાગ્યે ઑબ્ઝર્વર્સની હાજરીમાં કરવામાં આવશે. મતગણતરીના દરેક ટેબલ પર એક માઈક્રો-ઑબ્ઝર્વર, એક કાઉન્ટિંગ સુપરવાઈઝર અને એક કાઉન્ટિંગ આસિસ્ટન્ટને ફરજ સોંપવામાં આવી છે. ઉપરાંત, કાઉન્ટિંગ હૉલમાં બે માઈક્રો-ઑબ્ઝર્વર મૂકવામાં આવશે. મતગણતરીની સમગ્ર પ્રક્રિયાની વિડિયોગ્રાફી કરવામાં આવશે.
મતગણતરી મથકોમાં આ લોકોને એન્ટ્રી
મતગણતરી મથકો પર માત્ર ભારતના ચૂંટણી પંચ (Election Commission of India) દ્વારા માન્યતા પ્રાપ્ત અધિકારીઓ, નિરિક્ષકો, ફરજ પરના કર્મચારીઓ-અધિકારીઓ, ઉમેદવારો, તેમના ચૂંટણી એજન્ટો તથા કાઉન્ટિંગ એજન્ટ્સ પ્રવેશ કરી શકશે. ઉપરાંત, ભારતના ચૂંટણી પંચ દ્વારા જેમને અધિકાર પત્રો આપવામાં આવ્યા છે તેવા મીડિયાકર્મીઓ પણ પ્રવેશ કરી શકશે. ચૂંટણી અધિકારી/ મદદનીશ ચૂંટણી અધિકારી, ઉમેદવાર કે તેમના અધિકૃત પ્રતિનિધિઓ તથા ભારતના ચૂંટણી પંચ દ્વારા નિમણૂંક પામેલા ઑબ્ઝર્વર્સની હાજરીમાં સ્ટ્રોંગરૂમ (STRONG ROOM) ખોલવામાં આવશે. ત્યારબાદ EVM રાઉન્ડવાઈઝ બહાર કાઢી કાઉન્ટિંગ હૉલમાં લાવવામાં આવશે. સવારે 8 વાગ્યે પોસ્ટલ બેલેટ તથા EVM ના મતોની ગણતરી શરુ કરાશે.
કેન્દ્ર પર પોલીસ, CRPF અને SRPF નો ખડકલો
તમામ કાઉન્ટિંગ સેન્ટર પર ત્રિસ્તરીય સુરક્ષા વ્યવસ્થા સુનિશ્ચિત કરવામાં આવી છે. આ અંગે વાત કરતાં મુખ્ય નિર્વાચન અધિકારી પી. ભારતીએ જણાવ્યું કે, મતગણતરી કેન્દ્રના કેમ્પસની બહાર સ્થાનિક પોલીસનો પહેરો હશે. મતગણતરી લોકેશન પર srpf અને મતગણતરી કેન્દ્ર તેમ જ સ્ટ્રોંગ રૂમના દરવાજાની બહાર crpf નો ચુસ્ત બંદોબસ્ત હશે. ફરજ પરના અધિકારીઓ અને મંજૂરી પ્રાપ્ત રાજકીય પ્રતિનિધિઓ સિવાય અન્ય વ્યક્તિઓને આ સંકુલમાં પ્રવેશવા દેવામાં આવશે નહીં.
મોબાઈલ, લેપટૉપ જેવા ઈલેક્ટ્રોનિક ઉપકરણો પર પ્રતિબંધ
રાજ્યના તમામ કાઉન્ટિંગ સેન્ટર્સને કોમ્પ્યુટર, ઈન્ટરનેટ, ટેલિફોન (લેન્ડલાઈન) અને ફેક્સ જેવી અત્યાધુનિક સંચાર સુવિધાથી સજ્જ કરવામાં આવ્યા છે. મોબાઈલ ફોન, આઈ-પેડ કે લેપટૉપ જેવા ઈલેક્ટ્રોનિક ઉપકરણો મતગણતરી કેન્દ્રમાં લઈ જઈ શકાશે નહીં. કમિશનના ઑબ્ઝર્વર્સ પર આ પ્રતિબંધ લાગુ પડશે નહીં. ETPBS ની મતગણતરી પ્રક્રિયામાં (Lok Sabha Election) આવશ્યક OTP મેળવવા રિટર્નિંગ ઑફિસર, આસિસ્ટન્ટ રિટર્નિંગ ઑફિસર અથવા કાઉન્ટિંગ સુપરવાઈઝર્સ પૂર્વ પરવાનગી સાથે સાયલન્ટ મોડ પર મતગણતરી કેન્દ્રમાં મોબાઈલ લઈ જઈ શકશે. દરેક મતગણતરી કેન્દ્રમાં મીડિયા સેન્ટર ઊભુ કરવામાં આવ્યું છે. મીડિયા સેન્ટર તથા પબ્લિક કૉમ્યુનિકેશન રૂમ સિવાય મતગણતરી કેન્દ્રના સંકૂલમાં ક્યાંય પણ મોબાઈલ ફોનનો ઉપયોગ કરી શકાશે નહીં. મતગણતરીના દિવસે https://results.eci.gov.in/ પર ચૂંટણીના પરિણામો જાણી શકાશે. રાજ્યકક્ષાએ મીડિયાકર્મીઓને પરિણામની વિગતો મળી રહે તે માટે નવા સચિવાલયના બ્લોક નં. 1 ના ચોથા માળે સમિતિ ખંડમાં મીડિયા સેન્ટર ઊભું કરવામાં આવશે.
આ પણ વાંચો – Lok Sabha Elections : ECI એ પાંચ તબક્કાના મતદાનનો સંપૂર્ણ ડેટા જાહેર કર્યો, કહ્યું- દરેક મતની ગણતરી…
આ પણ વાંચો – Congress : સોનિયા, રાહુલ અને પ્રિયંકાએ કોંગ્રેસને વોટ ના આપ્યો ..!
આ પણ વાંચો – Varanasi : પીએમની આ બેઠક પર આજે દિગ્ગજો ઉતરશે પ્રચારમાં…
